Hussain (A.S) Aap Ki Ghurbat Bahut Rulati Hai
Hussain Aapka Gham Kitna Nafsiyati Hai
Zara Si Baat Bahot Der Tak Rulati Hai
Khuda Gawah Mere Dil Ko Roze Aashura
Hussain Aapki Ghurbat Bahut Rulati Hai
Kadakti Dhoop Wo Garmi Wo Pyaas Ka Ghalba
Hussain Aapki Ghurbat Bahut Rulati Hai
Musaafirat Me Ye Ghurbat Bhi Aapne Dekhi
Hussain Aapke Dil Par Na Jaane Kya Guzri
Bana Jab Aapka Mehman Hur Mere Moula
Nahi Tha Aapke Khaime Me Boond Bhar Pani
Kareem Aapka Mehman Rah Gaya Pyasa
Bala Ke Dasht Me Ibne Hasan Ke Tukde The
Zameen E Garm Pe Qasim Ke Tan Ke Tukde The
Wo Jisko Aapne Khud Baap Ban Ke Paala Tha
Nazar Ke Saamne Us Gulbadan Ke Tukde The
Uthaya Khak Se Rote Huye Har Ek Tukda
Kabhi Furat Kabhi Arz E Nainawa Roi
Hussain Aapki Haalat Pe Karbala Roi
Na Roi Apne Dularo'n Ki Lash Par Zainab
Magar Wo Aapki Ghurbat Pe Ja Ba Ja Roi
Bahen Aapki Bas Aap Par Kiya Girta
Jigar Tha Aapka Aye Ibne Fatah E Khaibar
Akele Aap The Kadyal Jawa'n Ke Lashe Par
Jhinjhodti Hai Bahot Aapki Wo Tanhai
Uthaya Aapne Peeri Me Lasha E Akbar
Nahi Tha Aapka Pardes Me Koi Apna
Diler Zaigham O Jarrar Mar Gaya Ran Me
Hussain Aapka Ghamkhwar Mar Gaya Ran Me
Jo Hath Aapki Quwwat The Aye Mere Moula
Kate Wo Alamdar Mar Gaya Ran Me
Jari Ne Aapke Zaanu Pe Apna Dam Toda
Salam Aapki Himmat Ko Sayyad E Mazloom
Chhida Hai Teer Se Asghar Ka Jis Ghadi Hulqoom
Dahade Maar Ke Roya Hai Sabr Khud Us Dam
Huwa Jab Aap Ke Hatho'n Pe Munqalib Masoom
Wo Be Zaban Pisar Aur Wo Teer E Seh Shoba
Jise Sukoon Batate Aap Khud Apna
Wo Jisko Aapke Seene Pe Chain Milta Tha
Sakina Aap Se Jis Dam Juda Hui Hogi
Kaleja Aapka Us Waqt Phat Gaya Hoga
Wo Char Saal Ki Bachchi Ko Chhod Kar Jana
Qadam Qadam Pe Rulaya Hai Sham Walo'n Ne
Musaafirat Me Sataya Hai Sham Walo'n Ne
Kaha'n Ye Zulm Kisi Be Watan Pe Hota Hai
Jo Zulm Aap Pe Dhaya Hai Sham Walo'n Ne
Rula Rula Ke Laeeno'n Ne Aapko Mara
Wo Be Kasi Wo Museebat Wo Aalam E Ghurbat
Paraya Des, Zaeefi, Wo Pyaas Ki Shiddat
Wo Dard Aapka Kaise Raqam Kare Waiz
Bayan Ali Se Na Hogi Wo Aapki Halaat
Lahu Ke Ashk Rulata Hai Bas Yahi Jumla
Hussain Aapki Ghurbat Bahut Rulati Hai 💔