Bataya Madar-e-Abbas Ne Sughra Ko Ro Ro Kar
Madine Mein Yeh Lut Kar Qafila Aaya Hai Ae Sughra
Meri Bimaar Beti Dil Pe Rakh Le Sabr Ka Patthar
Madine Mein Yeh Lut Kar Qafila Aaya Hai Ae Sughra
Mera Qasim Nahin Aaya, Mera Asghar Nahin Aaya
Main Kis Dil Se Kahun Tujh Se, Tera Akbar Nahin Aaya
Palat Kar Aaye Hain Pardes Se Sajjad Aur Baqir
Madine Mein Yeh Lut Kar Qafila Aaya Hai Ae Sughra
Tujhe Is Waste Lagti Hain Yeh Sab Jaani Pehchaani
Yeh Tere Apne Hi Ghar Ki Hain Shaklein Saari Noorani
Aziyat Ke Sabab Sughra, Budhapa Aa Gaya Un Par
Madine Mein Yeh Lut Kar Qafila Aaya Hai Ae Sughra
Asa Ke Saath Jo Baitha Hai Woh Sajjad Hai Sughra
Jawani Mein Gaya Tha Ghar Se, Tujh Ko Yaad Hai Sughra
Qamar Kham Ho Gayi Uski, Sitam Itne Hue Us Par
Madine Mein Yeh Lut Kar Qafila Aaya Hai Ae Sughra
Ba I'jaz-e-Imamat Karbala Ke Dasht Mein Sughra
Tera Chehra Tere Baba Ne Akbar Ko Dikhaya Tha
Suna Yeh Hai Bohat Roya Tha Tujh Ko Dekh Kar Akbar
Madine Mein Yeh Lut Kar Qafila Aaya Hai Ae Sughra
Nazar Chehre Pe Daali, Rahat-e-Jaan Ko Na Pehchana
Qayamat Aa Gayi, Sughra Ne Jab Maa Ko Na Pehchana
Kaha Khud Maa Ne Seene Se Laga Kar Ae Meri Dilbar
Madine Mein Yeh Lut Kar Qafila Aaya Hai Ae Sughra
Kahani Karbala Ki Jab Sunai Ro Ke Zainab Ne
Kiya Maatam Shaheedan-e-Wafa Ka Der Tak Sab Ne
Har Ik Bibi Bade Hi Dard Se Kehti Thi Yeh Ro Kar
Madine Mein Yeh Lut Kar Qafila Aaya Hai Ae Sughra
Ali Asghar Ka Jis Dam Khoon Bhara Kurta Nazar Aaya
Khuda Jaane Ke Tab Saiyadaniyon Ne Kaise Samjhaya
Rabab Khasta Tan Bolin, Na Saath Aaya Mere Asghar
Madine Mein Yeh Lut Kar Qafila Aaya Hai Ae Sughra
Lipat Kar Roi Jab Sughra, Tadap Kar Reh Gayin Zainab
Zara Si Der Mein Saari Kahani Keh Gayin Zainab
Kaha Ro Ro Ke, Ik Din Mein Hua Taaraj Mera Ghar
Madine Mein Yeh Lut Kar Qafila Aaya Hai Ae Sughra
Alam-e-Abbas Ko Jab Madar-e-Abbas Ne Dekha
Nazar Ke Samne Bete Ka Foran Aa Gaya Chehra
Na Ho Ehsas Sughra Ko, Sambhala Khud Ko Yeh Keh Kar
Madine Mein Yeh Lut Kar Qafila Aaya Hai Ae Sughra
Bayan Asif Karun Kaise Ke Sughra Ko Diya Pursa
Phir Uske Baad Har Bibi Ne Sughra Se Liya Parda
Sabhi Aansu Bahate The, Sabhi Kehte The Ro Ro Kar
Madine Mein Yeh Lut Kar Qafila Aaya Hai Ae SughraThis channel managed by Ya Zehra Tv Network - India's Largest YouTube management Network.