Ghire hai laakho(n) mein kaise, hussain bekaso tanha, sakina dekh rahi hai

Dare khayam se ran mein, ulat ke khayme ka parda, sakina dekh rahi hai

1. Wo zibha hote huwe baap ko na dekh sake

Meri sakina hai masoom ye khayaal rahe

Sitam ye uspe na dhaana abhi churi na chalana, sakina dekh rahi hai

2. Badan hai teero(n) se chalni hai zakhm zakhm hussain

Bapaa hai khayma-e sarwar mein ek shoro shayn

Kabhi laeen ka khanjar kabhi wo pyaasa gala, sakina dekh rahi hai

3. Gira hai aag ke sholo mein khayma-e sarwar

Haram hussain ke rote hai lut gayi chaadar

Kabhi phuphi ka khula sar kabhi hussain ka khayma, sakina dekh rahi hai

4. Badan ke zakhmo(n) ka marham kahi nahi milta

Adoo hussain ko dete hai kis qadar izaa

Jise batool ne pala sar uska barsare neza, sakina dekh rahi hai

5. Tumhaare laashaa-e be sar ko du(n) kafan kaise

Mujhe bataao zara tum batool ke bete

Hai bekasi ka natija padha hai ret pe laasha, sakina dekh rahi hai

6. Koi yatimo pe aisa sitam nahi karta

Bas ek baar mera haal dekhlo baba

Suno ay shahe zamana kisi ne jo nahi dekha, sakina dekh rahi hai

7. Bayaan karti thi binte hussain ibne ali

Tumhaare baad musibat ki intehaa dekhi

Tumhaare baad ye ghurki, tumhaare baad tamacha, sakina dekh rahi hai

8. Na khench ghurbate shabbir ka koi manzar

Sadaa-e ghayb ye aati hai ajaae qaisar

Nahi hai zabt ka yaara qalam ko rok khudara, sakina dekh rahi hai