Nouha Zainab(sa) ka tha utho Sher-e-Jawa'n,

Aye mere bawafa, utho Sher-e-Jawa'n.

1) Binte Haider(as) tadap kar ye kehti rahi,

Dar se qaime ke mai dekhti reh gayi,

Bhai maara gaya, utho Sher-e-Jawa'n..

2) Shaam-e-gham ye sitam haaye hum par hue,

Chhin gayi chaadarein aur qaime jaley,

Dekho aake zara, utho Sher-e-Jawa'n..

3) Dukhtar-e-Shah-e-Deen ko tamaache lagey,

Kaan zakhmi hue gaal neele hue,

Zulm aisa hua, utho Sher-e-Jawa'n..

4) Berida humko Darbar me le gaye,

The tamaashaayi baithe hue hum khadey,

Thi qiyamat bapaa, utho Sher-e-Jawa'n..

5) Haaye Sajjad(as) par zulm dhaaye gaye,

Har qadam par usey taaziyaane lagey,

Shimr ne ki jafaa, utho Sher-e-Jawa'n..

6) Peeke jaam-e-qazaa tishnagi mit gayi,

Qaid me margayi yu'n Sakina teri,

Yaad tujhko kiya, utho Sher-e-Jawa'n..

7) Raaste par jafaa Shaam-o-Kufa ke sab,

Berida hum rahe sharm se chup the lab,

Saaniye Murtuza(as), utho Sher-e-Jawa'n..

8)Bayn karti rahi Zainab-e-qasta-tan,

Mai ne aise uthaaye hain ranj-o-mehan,

Tukde dil hogaya, utho Sher-e-Jawa'n..

9) Ek mehshar tha Hasnain o Sahil bapaa,

Zainab-e-qasta-ja'an padhti thi marsiya,

Lutt gaya qafela, utho Sher-e-Jawa'n..